Este venres contaremos coa presenza de moitos dos autores dos filmes a proxectar. Sempre é enriquecedor para a propia percepción persoal o diálogo que se establece co creador de cada unha das obras.
A programación dará comezo ás 17 h. no auditorio do concello coa proxección do Bloque 5, que consta das curtas Lurna, Homes, El Pozo e Spaghetti Western. Nani Matos (Lurna) e Héctor Domínguez-Viguera (El Pozo) realizarán a presentación dos seus filmes.
Ás 18:30 h., acompañaranos Xisela Franco para presentar Visións, un traballo colaborativo dirixido por ela e composto de dez curtametraxes realizadas por cineastas da provincia de Pontevedra. Dez relatos audiovisuais contados por mulleres que reivindican o seu espazo.
Para presentar Tempo (no Auditorio ás 20 h) asistirán o produtor, Alejandro García Fernández, e un dos compositores da banda sonora, Alexandro González. O filme, dirixido por Manuel Valcárcel, é unha fermosísima elexía polo extraordinario ecosistema do Courel, ecosistema que non deixa de ser devastado por obra e gracia do ser humano.
A última proxección do día será Contrafaces, de Fon Cortizo, que se exhibirá ás 22 h. no mesmo auditorio. Trátase dun documental rodado en Galicia, Islandia e Canadá que explora os límites da expresión poética. Unha das protagonistas do filme é a poeta canadiana Erin Moure, que proximamente será investida doutora honoris causa pola Universidade de Vigo.
O Camões ofrécenos a oportunidade de pasar unha tarde gozando co talentoso cinema portugués coa proxección de tres bloques de curtas. Poderemos conversar cunha das directoras que fará unha pequena presentación do seu filme.
