O peche da oitava edición do Festival Primavera do Cine terá lugar este domingo 5 de maio, Día Mundial da Lingua Portuguesa, ás 19 h. no Auditorio do Concello de Vigo. Nesta efeméride queremos conmemorar a irmandade entre Galicia e os países da lusofonía coa entrega dos oito premios que concede este festival ás cinematografías de ambas as dúas comunidades. A gala será conducida pola actriz galega Bea Campos e amenizada por Senza —unha banda portuguesa que nos achegará ás sonoridades dos países de fala portuguesa—, e polo Grupo Amador de Teatro Português do Instituto Camões. Así mesmo, proxectarase O meu poeta, unha fermosa curtametraxe de Hugo Portela Larisch que afonda no sentimento de saudade a través da música, a poesía e as lembranzas familiares.

No evento daranse a coñecer os gañadores dos seis premios que outorgará o público:

• Longametraxe, curtametraxe e videoclip galegos.
• Longametraxe e curtametraxe da lusofonía.
• Curtametraxe de animación (galega e lusófona).
•  

Pola súa banda, o terceiro xurado do Festival Primavera do Cine, composto por Alexandre Cancelo, Lola Correa, Anabel G. Penín e José Manuel López, tamén comunicará o seu palmarés, correspondente ao premio do xurado á mellor longamextraxe galega e ao premio do xurado á mellor longametraxe lusófona.

Nesta celebración da sétima arte e da irmandade galego-lusófona, non faltarán a emoción, o humor e, sobre todo, o cine. Non podería ser doutro xeito.