Esta xornada cinéfila arrancará coa proxección de catro bloques de curtas galegas, que serán presentadas por varios dos seus creadores. Santos Díaz, Pablo Martínez, Roi Carballido, Nani Matos, Héctor Domínguez-Viguera e Miguel Grandío, farán unha pequena introducción ás súas curtas e respostarán preguntas, dúbidas e suxerencias. Altamente recomendable e moi grande o talento dos novos realizadores galegos.
Ás 18 h. será a estrea internacional de Fósforo Frío, do portugués Ricardo Franco. Protagonizada polo recoñecido actor Virgílio Castelo e Manuel Jerónimo, o filme é unha poética historia de amor, desamor e morte.
O Auditorio acollerá ás 19:30 h. a retrospectiva do cineasta tudense Alberto Estévez Piña, que será presentada por Julio Pérez Perucha, presidente da Asociación Nacional de Historiadores do Cine. O acto de homenaxe incluirá a proxección de dous filmes necesarios para coñecer a nosa historia como son Romería da morte (1974) e Después del silencio (1978); e un coloquio posterior co mesmo Estévez Piña, acompañado de Pérez Perucha e Ángel Vázquez de la Cruz.
A programación do día rematará coa proxección de Retornos, ópera prima de Luis Avilés, ás 22 h. no Auditorio municipal. Trátase dunha combinación de drama e thriller moi ben ambientada na Galicia rural. Retornos está protagonizado por Xavier Estévez e Manuela Vellés, e conta con secundarios de luxo como Xosé Manuel Olvera ‘Pico’, Luis Zahera, María Bouzas ou Emilio Gutiérrez Caba.